Hey dä Winter isch verbi und s wird wieder wärmer…(welle Winter)oops falsches Jahr sorry.
S isch ja jetzt scho recht warm und doch han i na äs paar ganz heissi News für dich!!!
gad am Ahfang mal d Übersicht über all das wo eb etz a dä Kanti chrischtlichs alles lauft:
Montags: 11:30 – 13:10 BG
Mittwochs: 9:30 – 9:50 gebet@kzu
Freitags: Go(o)d Food Mittag
Mo-Fr: 7:45-7:55 Früehgebät
Und zwar wirds ab sofort en “Go(o)d Food Mittag” gäh.
(fallst en vorschlag für en bessere Name häsch gad säge!! S isch eifach mal so mini i erscht Idee gsih)
Dä GFM findet jewills am Fritig i dä 2. Mittagsstund( 12:25- 13:05) i dä Mensa statt. Und zwar sölls eifach en “Chrischte Tisch” sih wo mer änand besser kenne lernt und mitenand isst.
Zum nögschte und zwar wirds ab nögschter Wuche wieder es Früehgebät gäh, d.h. es gits eigentlich etz scho und zwar betet d Sashika und ihri Kollegine täglich am 7:45 vor ihrem jewillige Zimmer, doch wärs cool wenn na meh würed dä bi si und s Früehgebät wieder zu allter Stärchi wür cho.
D Treffpünkt wäred am:
Mo. 2.Stock bi dä WC
Di. 3. Stock bim Zimmer 309
Mi. Erdgschoss bim Zimmer E39
Do. 4. Stock bim Zimmer 404
Fr. 2 Stock bim Zimmer 215
Und hey was macht di fiter als am Dunnstig morge churz in 4. Stochk ufe und nachher wieder aberenne? Und öpis bessers als mit Gott in Tag starte gits ja au nöd. Also d Sashi und ihri Kollegine würed sich sehr freu dich au mal i ihrere morgendliche Rundi s gseh.
Und namal ä erfreulichi News: Scho bald wird a dä Publikationswand ä Praybox hange, wo mer anonym es Zädeli mit meh Gebetsahliege chan ine rüehre und für das nachher betet wird. Mached doch au gad eu Mitschüler wo noni Christ sind druf ufmerksam.
D BG wird das Semester übrigens im Zimmer 220 statfinde und zwar immer am Mäntig vo 1130 -13:10
1. Stund isch zäme si und foode und
2. Stund isch bibellese und bäte
And last but not least: Am 6.7.07 werde mer äs fetts Barbecue oder suscht än coole Abig organisiere wos mega wär, wämer mal als volli Einheit vo Christe vo dä Kanti Bülach chönnted zäme cho und mal gseh wie viel mer eigentlich sind. Du wirsch di wunderä, wer alles Chrischt isch und drum markier der dä Tag etz scho Fett i dinerä Agenda oder überem Bett oder wo au immer, eifach so, dass der en frei bhaltsch!!
So ich gläb das wärs a Infos für dä Moment gsih.
Di jewillige Frtigabigtreffe sind bis uf witeräs mal uf Iis gleit falls aber Intresse ume isch oder si sogar vermisst werded, dänn melded eu doch umgehend bi mir und mer werdeds wirder ihfüehre.
So etz isch gläb wüki alles und ich wünsch der na ganz en schöne abig oder en guete tag je nachdem was etz gad für Ziit isch bi dir. Blieb in Jesus und heb Mut zu dim Glaube z`stah!
Und handled nach em Leitfvers:
„Lasst Christus den Mittelpunkt eures Lebens sein. Seid immer dazu bereit, denen Rede und Antwort zu stehen, die euch nach der Begründung eures Glaubens fragen!“ (1. Petrus 3,15 HFA)
